Pariselsel I Manjangan

 

          Kacerita I Manjangan sedek maplalianan di tengah alase. Tan pasangkan, teked ia di sisin telagane ane yehne ening. Di tengah telagane ada punyan tunjung. Di sisin telagane misi tetanduran bunga ane katon asri.

          Sawireh kenyel tur bedak, mareren ia laut nginem yeh. Ngenah kone lawatne di iyehe. Demen ia nepukin tandukne pacrenggah, bulunne gading, matane jelling. Nanging nyesel ia wireh batisne cenik lantang tur selem.

          Ri sedek ia bengong meseselan, saget ada suaran Macan ngelur, “Graauuuummm,….” Gruengan suaran macane nyejehin pesan. Makecos I Manjangan mlaib, kauber ban I Macan.

          Marasa dewekne kauber, sayan becat ia malaib macelep ka ebet-bete. Tandukne sesai nyangket di carang kayune, nglantudin palaibne, tambis – tambis ia kena kasagrep ban I Macan.

          Makliuk kone I Manjangan, nyilib beten bete, tusing tepukina ban I Macan. Bagia pesan kenehne nyidang ngalahang I Macan. Inget ia teken batisne ane jelek, ngranaang luput uli pancabaya. Tandukne renggah ane karasa melah, mawinan das sagrep Macan.

          Dadinne, tusing ja konyang ane karase jelek, mapuara jelek. Tusing masi konyang ane karasa melah mapuara ayu. Artine tusing ada kahuripan nulus paripurna. Tuah Ida Sang Hyang Widhi ane paripurna.